Eins og sjá má hefur Sunnan3 vefurinn fengið andlitslyftingu með nýrri heimasíðu. Opnun heimasíðunar og meðfylgjandi breytingar eru fyrsta skrefið í átt að rafrænu þjónustutorgi sem er eitt af menginverkefnum Sunnan3. Það er hugbúnaðarfyrirtækið Idega sem annast alla þróun og hönnun við heimasíðuna og þjónustutorgið. Til að byrja með mun heimasíðan fyrst og fremst hafa það hlutverk að kynna Sunnan3 verkefnið og veita upplýsingar um stöðu mála. Ekki verður því um neina gagnvirka þjónustu um að ræða fyrr en síðar í sumar. Þá munu íbúar geta fengið sín eigin svæði gagnvart sveitarfélögunum og notfært sér ýmsa rafræna þjónustu sem ekki hefur verið í boði áður.

Sunnan3 - verkefni um rafrænt samfélag, óskar eftir samstarfsaðilum um tilraun til reksturs þriggja skrifstofuhótela í sveitarfélögunum Árborg, Hveragerði og í Ölfusi.

Markmiðið með uppbyggingu skrifstofuhótels er að koma til móts við þarfir íbúa sveitarfélaganna þriggja sem starfa á höfuðborgarsvæðinu, en vilja og hafa tök á að vinna hluta sinnar vinnu í heimabyggð. Leitað er eftir fullbúinni skrifstofuaðstöðu með öflugu háhraðasambandi. Æskilegt er að húsnæðið sé rekið í tengslum við annan rekstur til að tryggja lifandi starfsumhverfi og einnig til að halda niðri rekstrarkostnaði. Ekki er skilyrði að sami aðilinn sjái um rekstur hótelanna þriggja.

Kostir skrifstofuhótels eru augljósir fyrir starfsfólk sem þarf að sækja vinnu fjarri heimabyggð, en einnig er stefnt að hagræðingu fyrir vinnuveitendur, einkum í lækkun skrifstofukostnaðar.

Áætlað er að tilraunin standi í eitt ár og að þeim tíma liðnum verður gerð úttekt á árangri hennar. Sunnan3 veitir fjárstuðning til rekstursins á meðan að á tilrauninni stendur, en markmiðið er að í framtíðinni verði skrifstofuhótelin sjálfbærar rekstrareiningar.

Hér má finna kröfulýsingu vegna skrifstofuhótels.

Rafrænt þjónustutorg fyrir íbúa Árborgar, Hveragerðis og Ölfus var opnað í dag. Með rafrænu þjónustutorgi eignast íbúar sína eigin vefsíðu hjá sveitarfélaginu. Mjög einfalt er að sækja um notendanafn og lykilorð, og til þess að tryggja fullkomið öryggi fá íbúar lykilorðin send í netbankann sinn. Þeir sem ekki hafa aðgang að netbanka fá upplýsingarnar sendar með bréfi. Á þjónustutorginu geta íbúar kannað stöðu fjármála og haldið utan um sín samskipti við sveitarfélagið, séð nýjustu skilaboð og spjallað beint við ákveðna starfsmenn. Einnig hafa þeir beinan aðgang að atburðadagatali, veðrinu, fjölmiðlum og annarri gagnlegri þjónustu.

Nú geta íbúar sent inn umsóknir með gagnvirkum hætti beint af þjónustutorginu. Allur ferill og afgreiðsla umsóknarinnar er sjálfvirkur sem sparar tíma við innslátt, vinnslu og flýtir fyrir ákvarðanatöku. Til að byrja með verður hægt að senda inn umsóknir um grunnskóla, frístundarheimili, skólamáltíðir, og leikskóla

Hér er um að ræða tímamót í rafrænum samskiptum sveitarfélaga og íbúa. Það sem greinir þetta þjónustutorg frá sambærilegum kerfum er að þarfir íbúanna eru settar í forgang og þeir fá þannig fullkomið sjálfsafgreiðslukerfi í hendurnar.